Etxebizitza-estudioa

Proiektuak II ikasgaia bukatzeko azkeneko proiektua baino ez da falta. Oraingoan egin behar dugun proiektua, Ondarreta hondartzaren parean kokatzen den orube libre batean etxebizitza-estudio bat egitea da. Nik, nire proiektua pentsatu aurretik orube horren inguruetatik buelta batzuk eman nituen, inguruko eraikinak aztertzeko asmoz. Hauek aztertu ondoren, konturatu nintzen eraikin guztiak ez zutela zerikusirik bata bestearekin: euskal tipologiako etxeak, etxe modernoak, jauregi moduko etxeak... Hau guztia ikusita, nik ere etxe singular bat egitea erabaki nuen. Burura etorri zitzaidan lehendabiziko ideia dorre bat egitea izan zen. Dorrearen inguruan, L eran nire etxea egongo litzateke, eta etxearen goiko pisuan arkitektura estudioa. Orduan, dorreaz baliatuko nintzateke bezeroak estudiora eta etxekoak etxera zuzentzeko, hau da, portal moduan erabiliko nuke dorrea. 

Hori zen nire hasierako proiektua, baina klasean irakasleek zuzenketak egin ondoren, hainbat gauza aldatu behar izan nituen. Alde batetik, esan zidaten dorrea L forma zuen eraikinetik bereizteko. Horrez gain, esan zidaten dorrean estudioa sartzea, eta beste eraikina etxerako soilik uztea. Gainera, etxebizitzan egindako barne banaketaren simetrikoa egitea proposatu zidaten, horrela eguzki-izpiak hobeto aprobetxatzeko asmoarekin.

Blogera ez ditut plano zaharrak igoko, ez baitgaituzte inora eramaten, baina nire proiektuaren bilakaera nolakoa izan den azaltzea ondo zegoela uste dut.

Bukaerako proiektuaren ideograman ikus daitezke dorrea, etxea eta bi hauek lotzen dituen pasarela. Piktogramari dagokionez, orain aipatutakoak ere ikus ditzakegu, baina estalkiei eman diedan inklinazioa azalduz.

Ideograma eta piktograma

Influentziei dagokionez, Alvar Aaltok egindako Muuratsalo eraikina hartu dut erreferentzia gisa. Eraikin horretan estalkiekin jolastu egiten du, eta erdian lorategi bat sortzen du. Nik etxe horretaz baliatuz, nire eraikinen estalkiei ere inklinazio bat eman diet, hauen guztien inklinazioaren norabidea lorategi zentralera zuzentzen direlarik.

Influentziak

Ondoren bi kokapen plano egitea apropos iruditu zitzaidan. Bata 1:500 eskalan egin nuen, detaile gutxiagorekin, eta bestea 1:200 eskalan, zenbaid detaile gehiagorekin.

Gero, oinplanoak egiteari ekin nion:

Ondoren egin nuena, nire eraikinaren lau altxaerak izan ziren:

Azkenik, eraikinaren pare bat ebaketa egin nituen:

Proiektuarekin guztiz bukatzeko 1:100 eskalan maketa bat egin nuen:

 

Azken proiektuaren influentziak

Irakasleek bidali diguten kurtsoko azken proiektua Ondarreta hondartzaren ondoan etxebizitza eta estudio bat egitea da. Proiektua abian jartzeko lehenbizi influentzia batzuk hartu behar ditugu kontuan. Nik Mies Van der Rohek diseinatutako "Casa de 3 patios" eta Alvar Aaltok egindako Muuratsalo etxea hartu ditut oinarri. Casa de 3 patios etxea ez zen eraikitzera iritsi. Muuratsalo etxea, berriz, finlandiako izen bereko irlan eraikita dago.

Hona hemen Muuratsalo etxearen argazkiak:

Etxe hauei buruz analisi bat egin behar izan dut.

Lehenbizi, eremu pribatua eta publikoa aztertu dut. Urdinez dagoena eremu publikoa da, berdez dagoena pribatua eta morez dagoena patio eta lorategiak.

Muuratsala etxearen oinplanta

Casa de 3 Patios etxearen oinplanta

Ondoren nukleo hezeak non dauden aztertu dut. Marra urdinez dagoena sukaldea da eta marra berdez dagoena komunak. 

 Muuratsala etxearen oinplanta

 Casa de 3 Patios etxearen oinplanta

Azkenik, bi etxeen ibilbideak aztertu ditut.

 Muuratsala etxearen oinplanta

 Casa de 3 Patios etxearen oinplanta

Tailer bateratua 5

Tailer bateratua ikasgaiarekin bukatzeko Imanolena etxearen zuinketa prestatu dugu. Zuinketa honetan bai erdarazko eta bai euskarazko ikasleek parte hartu dugu. Horretarako talde berriak sortu ditugu. Nire taldean Iker Andueza, Mikel Bellido eta Unai Roldan zeuden. Talde bakoitzak funtzio berezi bat zuen. Nire taldeak zuen eginbeharra egiten ziren gauza guztiak egiaztatzea zen. Hasieran bazirudien gauza gutxi egin behar genituela, baina oker genbilen. Neurri guztiak egiaztatu behar izan ditugu, eta horietako batzuk zuzendu ere. Horrez gain, bidaltzen ziren adreiluak eta jasotzen zirenak kontrolatu behar izan ditugu. Honetan ere arazoak izan ditugu; izan ere, materialekoek 52 adreilu bidali dituztela zioten eta 50 baino ez dira iritsi. Hala ere, gure taldea horretarako zegoenez, arazoa laster konpondu dugu.

Bukatzeko esan behar da, oso ariketa polita izan dela gaurkoa, eta espero dudala hurrengo ikasturteetan zehar  holako gauzak errepikatzea. Gainera, ariketaren helburua lortu da, hau da, Imanolena etxearen zuinketa egitea.

Tailer bateratua 4

Tailer bateratuko 4. aste hau eraikuntzaren analisiko irakasleak zuzendu du. Aste honetan egin beharreko lana imanolena etxea aztertzea izan da: orubea nolakoa den, etxearen egitura- eta itxitura-sistemak, eraikuntza detaileak, etabar.